Եթե գտնվում ես Երևանում կամ Գյումրիում, ապա վնասված համարանիշը վերանորոգելու համար պետք է այցելես Երևանի ՀՔԲ-ներ (Գաջեգործների 76, Իսակովի 9) կամ Շիրակի մարզի ՀՔԲ (Թբիլիսյան խճուղի, 2/14), որտեղ նոր կամ նորոգված համարանիշը կտրամադրվի անմիջապես։

Իսկ եթե գտնվում ես մարզերում, ապա անհրաժեշտ է վնասված համարանիշը մոտեցնել տվյալ մարզի հաշվառման-քննական բաժին (ՀՔԲ) և դիմել այն վերաթողարկելու համար։ Այդ դեպքում վարորդին 1 շաբաթ ժամկետով կտրվի ժամանակավոր համարանիշ։ Այդ 1 շաբաթվա ընթացքում վարորդը պետք է այցելի Երևանի ՀՔԲ՝ նոր թիթեղյա համարանիշը ստանալու համար։

Վնասված համարանիշը վերանորոգելու կամ վերաթողարկելու համար անհրաժեշտ է վճարել 12,000 դրամ։ Վճարումը կատարվում է տեղում՝ վճարային տերմինալի միջոցով։

Ավտոմեքենան հանվում է հաշվառումից, երբ․

• սեփականատերը փոխվում է,

• ավտոմեքենան մշտապես արտահանվում է ՀՀ տարածքից,

• ավտոմեքենան խոտանվում է։

Ավտոմեքենայի հանումը հաշվառումից իրականացվում է միևնույն հաջորդական քայլերով, ինչպիսիք ավտոմեքենայի առաջին հաշվառման դեպքում են։

Սպասարկման սրահի աշխատակիցը փաստաթղթերդ ստուգելուց և համապատասխան գրանցումներ կատարելուց հետո կտրամադրի՝

• 15 օր ժամկետով «ժամանակավոր» համարանիշ` սեփականատիրոջ փոփոխության դեպքում, երբ ավտոմեքենան հաշվառվելու է այլ մարմինների կողմից,

• 30 օր ժամկետով «տարանցիկ» համարանիշ՝ ավտոմեքենան ՀՀ տարածքից մշտապես արտահանելու դեպքում։ Ի դեպ՝ այս դեպքում քեզ կվերադարձվի նաև ավտոմեքենայի հաշվառման վկայագիրը (տեխնիկական անձնագիր)՝ ներքևի ձախ և վերևի աջ անկյունները կտրված վիճակում։

Ավտոմեքենայի սեփականատերը կամ նրա լիազորած անձը պետք է ներկայացնի՝

• անձը հաստատող փաստաթուղթ,

• ավտոմեքենայի ձեռքբերման օրինականությունը հավաստող փաստաթուղթ, եթե դրա սեփականության իրավունքը Ճանապարհային ոստիկանությունում գրանցված չէ,

• ավտոմեքենայի հաշվառման վկայագիրը (տեխնիկական անձնագիր),

• վերահաշվառման համար հիմք հանդիսացող փաստաթուղթը, ընդ որում՝ ավտոմեքենայի գույնը կամ համարանիշը փոփոխելու դեպքում այս փաստաթուղթը չի պահանջվում,

• տեղեկանք այն մասին, որ ավտոմեքենայի գույքահարկի պարտավորություններն ամբողջությամբ կատարված են,

• փաստաթղթերը լիազորված անձի կողմից ներկայացվելու դեպքում՝ նոտարի կողմից հաստատված լիազորագիր։

Ընդ որում՝ ավտոմեքենայի գույքահարկի պարտավորությունների կատարման վերաբերյալ տեղեկատվությունը ստուգվում է առցանց, ուստի պարտավորությունների ամբողջական կատարման դեպքում որևէ փաստաթուղթ ներկայացնելու անհրաժեշտություն չկա։

Էլեկտրական մեքենաները մաքսազերծում անցնելիս ազատված են՝

• մաքսատուրքից,
• բնապահպանական հարկից,
• ԱԱՀ-ից (ավելացված արժեքի հարկ)։

էլեկտրամոբիլների հզորությունը հաշվարկվում էր ձիաուժի հիման վրա, սակայն ապրիլի 1-ից հաշվարկվելու է ավտոմեքենայի էլեկտրոնային անձնագրի կամ հատուկ բանաձևի միջոցով։

Առաջին հերթին հիմք է ընդունվում տրանսպորտային միջոցի էլեկտրոնային անձնագրում առկա տվյալը։ Եթե այնտեղ հզորության վերաբերյալ տվյալներ չկան, հզորությունը որոշվում է հատուկ բանաձևով՝ կախված մեքենայի պիկային հզորությունից և գործակիցներից․

• մինչև 250 ձիաուժի դեպքում՝ առկա ցուցանիշը կբաժանվի 1.5 գործակցի,
• 250 ձիաուժից ավելիի դեպքում` մինչև 250 ձիաուժը բաժանվում է 1.5-ի, իսկ 250-ը գերազանցող մասը՝ 2.5 գործակցի։

Օրինակ՝ 2025 թվականի արտադրության 218 ձիաուժ հզորությամբ էլեկտրամոբիլի համար գործող կարգով վճարվում է մոտ 133,400 դրամ գույքահարկ, իսկ նոր հաշվարկով այն կկազմի մոտ 43,500 դրամ։

Եթե արդեն ունեք գրանցված էլեկտրամոբիլ, տվյալների փոփոխությունը կկատարվի ինքնաշխատ եղանակով։ Գույքահարկի այս հաշվարկը գործելու է 2026 թվականի ապրիլի 1-ից մինչև 2028 թվականի դեկտեմբերի 31-ը։

Ո՛չ։ Էլեկտրական մեքենաների դեպքում Ա և Բ գոտիների ավտոկայանատեղերում (կարմիր գծեր) կայանելն անվճար է։