Ինչպե՞ս դիմել

Դիմելու համար անհրաժեշտ է․

• անձամբ կամ լիազորված անձի միջոցով դիմել քաղաքացիական կացության ակտերի գրանցման գործակալություն (ՔԿԱԳ, տարածված է նաև ռուսերեն տերմինը՝ ЗАГС)։ Դիմումը լիազորված անձի միջոցով ներկայացվելու դեպքում ներկայացվում է նաև լիազորագիր, որը չի պահանջում նոտարական վավերացում,
• հավաքագրել և ներկայացնել անհրաժեշտ փաստաթղթերը։ 

Ներկայացվող պահանջները

Վկայականում (ակտային գրառման մեջ) փոփոխություն կատարելու համար անհրաժեշտ է հետևյալ հիմքերից մեկի առկայությունը՝

• կատարված ակտային գրառումը հետագայում փոփոխվել է և դիմումը ներկայացնելու պահին չի համապատասխանում վկայականում նշված անձանց անձնագրային տվյալներին,
• այլ մարմնի կողմից տրամադրված փաստաթղթի հետևանքով անհրաժեշտություն է առաջացել փոփոխություն կատարելու նաև կազմված վկայականում,
• ակտային գրառումը կատարվել է դիմումը ներկայացնող անձի հայտարարության հիման վրա, որը չի պահանջել հիմնավորող փաստաթղթերի ներկայացում:

Պահանջվող փաստաթղթերը

• դիմողի անձը հաստատող փաստաթուղթը կամ դրա պատճենը, որի վերաբերյալ կազմված է քաղաքացիական կացության ակտային գրանցումը, անչափահասի դեպքում՝ նրա ծնողի, խնամակալի, իսկ անգործունակ ճանաչված անձի դեպքում՝ հոգաբարձուի անձը հաստատող փաստաթուղթը,

• դիմումով ներկայացվող պահանջը հիմնավորող փաստաթղթերը, իսկ դրանց բացակայության դեպքում՝ այն տեղեկությունները, որոնց միջոցով հնարավոր է պարզել պահանջի հիմքերի առկայությունը,

• ուղղման, լրացման կամ փոփոխության ենթակա վկայականը կամ ակտային գրառման տվյալները:

Ուշադրություն
Եթե ուղղում կամ լրացում կամ փոփոխություն կատարելը առաջացնելու է անձը հաստատող փաստաթղթի փոփոխություն, ապա դիմումին կից նաև պետք է ներկայացվի 16 տարին լրացած անձի նկատմամբ ՀՀ-ում քրեական գործ հարուցված չլինելու, քրեական պատիժ չկրելու, հետախուզման մեջ չգտնվելու մասին իրավասու մարմնի կողմից՝ մինչև դիմումը ներկայացնելը առնվազն 1 ամիս առաջ տրված փաստաթուղթ:

Վճարման չափը

Քաղաքացիական կացության ակտերի գրանցման ուղղման և լրացման համար վճարվող պետական տուրքի չափը 5,000 դրամ է։

Քաղաքացիական կացության ակտերի գրանցման փոփախության համար վճարվող պետական տուրքի չափը 30,000 դրամ է։

Տրամադրման ժամկետը

• Ուղղումը կատարվում է անհրաժեշտ փաստաթղթերը ներկայացնելուց հետո՝ 15-օրյա ժամկետում,

• ուղղագրական սխալները կամ առանձին տառերի կամ թվերի ուղղումը կատարվում է անհրաժեշտ փաստաթղթերը ներկայացնելուց հետո՝ 3 աշխատանքային օրվա ընթացքում:

Հղում օրենսդրությանը

• «Քաղաքացիական կացության ակտերի մասին» ՀՀ օրենք։
• «Պետական տուրքի մասին» ՀՀ օրենք։

Իրավական ակտերը հնարավոր է տեսնել arlis.am-ում (անհրաժեշտ է կարդալ ակտերի վերջին տարբերակները)։