ՀՀ-ում Ազգային ժողովի ընտրությունների ժամանակ ընտրելու իրավունք ունեն ընտրության օրը 18 տարին լրացած ՀՀ քաղաքացիները։ 

Տեղական ինքնակառավարման մարմինների ընտրությունների ժամանակ ընտրելու իրավունք ունեն քվեարկության օրը 18 տարին լրացած՝ ընտրությունն անցկացվող համայնքի բնակչության ռեգիստրում`

• մինչև քվեարկության օրն առնվազն 6 ամսվա հաշվառում ունեցող ՀՀ քաղաքացիները,
• մինչև քվեարկության օրն առնվազն 6 ամսվա հաշվառում չունեցող, սակայն պարտադիր ժամկետային զինվորական ծառայությունից զորացրվելու հիմքով համայնքում հաշվառված ՀՀ քաղաքացիները,
• մինչև քվեարկության օրն առնվազն 6 ամսվա հաշվառում չունեցող, սակայն ազատազրկման ձևով պատիժը կրելուց ազատվելու հիմքով համայնքում հաշվառված ՀՀ քաղաքացիները,
• մինչև քվեարկության օրն առնվազն 1 տարվա հաշվառում ունեցող՝ ՀՀ քաղաքացիություն չունեցող անձինք։ 

Ընտրություններին չեն կարող մասնակցել այն անձինք, որոնք.

• դատարանի որոշմամբ ճանաչվել են անգործունակ,
• դատապարտվել են դիտավորությամբ կատարված ծանր հանցագործության համար և այդ պահին կրում են պատիժը։

Ընտրողների վերջնական ցուցակը քվեարկության օրվանից 7 օր առաջ տեղադրվում է Կենտրոնական ընտրական հանձնաժողովի կայքում և ՀՀ ներքին գործերի նախարարության կայքում՝ ներբեռնելու հնարավորությամբ:

Ընտրատեղամասը գտնելու համար անհրաժեշտ է՝ 

• մուտք գործել elections.mia.gov.am,
• սեղմել «Գտիր քո տեղամասը» կոճակը,
• լրացնել պահանջվող տվյալներ, 
• գտնել ընտրատեղամասը (Ընտրատեղամասի հասցեն հնարավոր է գտնել գլխավոր էջի «Ըստ տեղամասերի» բաժնում: Օրինակ՝ 9/12 ընտրատեղամասը գտնելու համար պետք է նախ գտնել 9-րդը, հետո՝ 9/12-ը)։

Ուշադրություն
Տվյալներն անհրաժեշտ է լրացնել՝ հետևելով բացված էջում գրված ֆորմատին (օր՝ 01/01․1991)։ 

Ընտրողների ցուցակը կարող ես ստուգել ընտրությունները կազմակերպող մարմնի կայքում։ 

Դրա համար անհրաժեշտ է՝ 

• կայքում ընտրել «Ընտրողների ռեգիստր» բաժինը,  
• բացված էջում մուտքագրել քո անունը, ազգանունը և ծննդյան տարեթիվը,
• սեղմել «Ես ռոբոտ չեմ» կոճակը,
• սեղմել «Որոնել» կոճակը։ 

Եթե տվյալներդ լրացնում ես ու ցուցակներում չես գտնում քեզ կամ կա հասցեի, անվան, ազգանվան որևէ սխալ, ապա դիմիր Ներքին գործերի նախարարության միգրացիայի և քաղաքացիության ծառայություն կամ ընդհանուր իրավասության առաջին ատյանի դատարան ընտրություններից 12 օր առաջ։ 

Ընտրությունների օրը քվեարկելու համար անհրաժեշտ է ներկայացնել հետևյալ փաստաթղթերից որևէ մեկը՝

• նույնականացման քարտ,
• կենսաչափական անձնագիր,
• ոչ կենսաչափական անձնագիր,
• անձնագրին կամ նույնականացման քարտին փոխարինող ժամանակավոր փաստաթուղթ։  

Եթե անձնագիրդ կամ նույնականացման քարտդ քեզ մոտ չեն (օր․՝ դեսպանատանն է), ապա ընտրություններին պետք է մասնակցես անձնագրին կամ նույնականացման քարտին փոխարինող ժամանակավոր փաստաթղթով։ 

Ժամանակավոր փաստաթուղթը տրամադրում է ՀՀ ՆԳՆ միգրացիայի և քաղաքացիության ծառայությունը։ 

Ընտրություններին հնարավոր է մասնակցել վավերականության ժամկետն անցած անձը հաստատող փաստաթղթով, եթե չունես այլ՝ վավերականության ժամկետը չլրացած անձը հաստատող փաստաթուղթ:

Եթե անձը հաստատող փաստաթղթի ժամկետը լրացել է առավելագույնը 6 ամիս առաջ, ապա հնարավոր է մասնակցել ընտրություններին այդ փաստաթղթով։ 

Եթե անձը հաստատող փաստաթղթի վավերականության ժամկետը 6 ամսից ավելի շուտ է լրացել, ապա այս փաստաթղթով ընտրություններին հնարավոր չէ մասնակցել և անհրաժեշտ է դիմել նորը ստանալու համար։ 

Ուշադրություն
Եթե դիմել ես անձնագիր ստանալու համար, սակայն մինչև ընտրությունների անցկացման օրը դեռևս չես ստացել այն, ապա ՆԳՆ միգրացիայի և քաղաքացիության ծառայության կողմից քեզ կտրամադրվի անձնագրին կամ նույնականացման քարտին փոխարինող ժամանակավոր փաստաթուղթ։ 

Քվեարկությունն անցկացվում է միայն ՀՀ տարածքում կազմավորված տեղամասային կենտրոններում, ժամը՝ 08։00-ից մինչև 20։00-ն։

Արտերկրում բնակվող ՀՀ քաղաքացիները ընտրություններին կարող են մասնակցել միայն ՀՀ-ում։

Այդուհանդերձ, Ազգային ժողովի ընտրություններին էլեկտրոնային եղանակով կարող են քվեարկել արտերկրում գտնվող հետևյալ քաղաքացիները.

• օտարերկրյա պետություններում ՀՀ դիվանագիտական կամ հյուպատոսական ծառայության մեջ գտնվողները,
• նրանց հետ արտերկրում բնակվող ընտանիքի այն անդամները, որոնք ունեն ընտրելու իրավունք,
• արտերկրում երկարատև ծառայողական գործուղման կամ ուսման մեջ գտնվող զինծառայողները։

Էլեկտրոնային քվեարկությունն իրականացվում է Կենտրոնական ընտրական հանձնաժողովի (ԿԸՀ) կարգով և ժամկետներում։

Ուշադրություն
Էլեկտրոնային եղանակով քվեարկության ժամկետները, հայտի ձևը, գրանցման մանրամասները սահմանված են ՀՀ ԿԸՀ-ի կողմից։ 

ՀՀ քաղաքացիություն չունեցող անձը ՀՀ-ում իրավունք ունի մասնակցելու միայն տեղական ինքնակառավարման մարմինների ընտրություններին, եթե մինչև քվեարկության օրը ընտրությունն անցկացվող համայնքի բնակչության ռեգիստրում ունենա առնվազն 1 տարվա հաշվառում։

Հաշմանդամություն ունեցող անձինք կարող են քվեարկել շարժական քվեատուփի միջոցով կամ  ընտրել ընտրատեղամասերից ամենահարմարն ու մասնակցել ընտրություններին՝ այդ ընտրատեղամասում քվեարկելով։  

Այս տարբերակով քվեարկության համար անհրաժեշտ է ընտրություններից 12 օր առաջ դիմում ներկայացնել ընտրական հանձնաժողով։ 

elections.am-ում ներկայացված են այն ընտրատեղամասերը, որոնք հարմարեցված են հաշմանդամություն ունեցող անձանց համար։

Ընտրատեղամասերը գտնելու համար անհրաժեշտ է կայքի «Ընտրություններ» բաժնում գտնել նախընտրելին և առկա փաստաթղթերում փնտրել «Մատչելի և մասամբ մատչելի տեղամասային կենտրոնների ցանկ» անվանմամբ փաստաթուղթը։

Շրջիկ արկղի միջոցով քվեարկելու իրավունք ունեն այն քաղաքացիները, ովքեր՝

• ստացիոնար բուժում իրականացնող բժշկական հաստատություններում ստացիոնար բուժման մեջ գտնվող են, 
• քվեարկության օրը տեղամասային կենտրոն ինքնուրույն ներկայանալու հնարավորություն չունեն,
• ռազմաբժշկական հաստատությունում ստացիոնար բուժման մեջ գտնվող զինծառայող են,
• ձերբակալված անձանց պահելու վայրերում (կալանավայրում) ձերբակալված են։ 

Ընտրատեղամասը փոխելու համար անհրաժեշտ է ընտրություններից 12 օր առաջ էլեկտրոնային կամ թղթային եղանակով ՆԳՆ Միգրացիայի և քաղաքացիության ծառայություն ներկայացնել դիմում։ 

Եթե ընտրողը չի ներկայացնում քվեարկության կտրոն, ապա ինքնասոսնձվող դրոշմանիշ փակցնող և քվեատուփի համար պատասխանատու անդամը տեղեկացնում է տեղամասային ընտրական հանձնաժողովի նախագահին, որն ընտրողից վերցնում է քվեարկության ծրարը, անհապաղ մարում է այն (պատռում)՝ առանց պարունակությունը ստուգելու:

Հանձնաժողովի անդամը ստուգում է կտրոնը և առանց քվեարկության ծրարն ընտրողից վերցնելու քվեաթերթիկին է փակցնում ինքնասոսնձվող դրոշմանիշը, որից հետո բացում է քվեատուփի ճեղքը, և ընտրողը քվեարկության ծրարը գցում է քվեատուփի մեջ:

Քվեարկելուց հետո ընտրողն անհապաղ պետք է դուրս գա քվեարկության սենյակից։

Դիտորդ կարող է դառնալ 18 տարին լրացած ՀՀ կամ օտարերկրյա քաղաքացին, որը ներկայացնում է հավատարմագրված դիտորդական կազմակերպություն։

Դիտորդը հետևում է քվեարկության ընթացքին ընտրատեղամասերում կամ տարածքային հանձնաժողովներում։ Արձանագրում է խախտումներ, կազմում զեկույցներ, ապահովում է թափանցիկություն։

Դիտորդ չեն կարող դառնալ՝

• ընտրական հանձնաժողովների անդամները,
• այդ ընտրություններին մասնակցող թեկնածուները,
• վստահված անձինք,
• տեխնիկական սարքավորումն սպասարկող մասնագետները,
• զանգվածային լրատվության միջոցների ներկայացուցիչները։

Դիտորդների լիազորությունները դադարում են ընտրությունների արդյունքների պաշտոնական հրապարակումից հետո 8-րդ օրը, եթե ընտրության արդյունքները դատարան չեն բողոքարկվել:

Ընտրությունների արդյունքները դատարան բողոքարկվելու դեպքում դիտորդների լիազորություններն ավարտվում են դատական ակտի հրապարակման օրվա հաջորդ օրը, եթե ընտրության երկրորդ փուլ կամ վերաքվեարկություն չի նշանակվել:

Ընտրության երկրորդ փուլի և վերաքվեարկության դեպքում դիտորդների կրկին հավատարմագրում չի պահանջվում, սակայն հավատարմագրված դիտորդների ցանկում փոփոխություններ (լրացումներ) թույլատրվում է կատարել ոչ ուշ, քան քվեարկության օրվանից 3 օր առաջ։ 

Վստահված անձ կարող է լինել միայն այն անձը, ով՝

• ՀՀ քաղաքացի է,

• գրանցված է այն կուսակցության կամ դաշինքի կողմից, որը մասնակցում է ընտրություններին,

• ունի ընտրական իրավունք։

Վստահված անձը՝

• Հետևում է քվեարկության և հաշվարկման օրինականությանը,

Վստահված անձը կարող է՝ 

• ներկայացնել բողոքներ կամ դիտարկումներ հանձնաժողովին,

• ներկա լինել քվեարկության ընթացքում,

• ունենալ կապի միջոցներ և արձանագրել ընտրական գործընթացը՝ առանց խոչընդոտելու։

Վստահված անձ չեն կարող լինել՝

• դատավորները,
• դատախազները,
• քննչական մարմիններում ինքնավար պաշտոն զբաղեցնող անձինք,
• ոստիկանություն ծառայողները,
• ազգային անվտանգության ծառայությունում ծառայողները, 
• դատական ակտերի հարկադիր կատարման ծառայությունում ծառայողները,
• քրեակատարողական ծառայությունում ծառայողները,
• պրոբացիայի ծառայությունում ծառայողները,
• փրկարար ծառայությունում ծառայողները, 
• զինծառայողները,
• դիտորդները,
• թեկնածուները,
• ընտրական հանձնաժողովների անդամները:

Հանձնաժողովի անդամ դառնալու համար անհրաժեշտ է՝

• լինել ՀՀ քաղաքացի,
• լինել 18 տարին լրացած,
• ունենալ ընտրական իրավունք,
• չլինել ծանր կամ առանձնապես ծանր հանցագործության համար դատապարտված,
• չունենալ չհաղորդված դատվածություն։

Հանձնաժողովի անդամը մասնակցում է ընտրությունների կազմակերպման և անցկացման ամբողջ գործընթացին, մասնավորապես՝

• Նշում է ընտրողների ցուցակը,
• հսկում է քվեարկության ընթացքը,
• հաշվում է քվեաթերթիկները,
• ստորագրում է արձանագրությունները,
• հետևում է ընտրությունների օրինականությանը տեղամասում։

Այցելու կարող են դառնալ ՀՀ-ում գրանցված, միջազգային կազմակերպությունների կամ օտարերկրյա պետությունների ներկայացուցիչներ, դիվանագետներ, ովքեր չեն հանդիսանում դիտորդական առաքելության կամ ԶԼՄ-ի ներկայացուցիչ։

Այցելուն կարող է՝

• Ազատորեն այցելել ընտրական տեղամասեր, 
• դիտել քվեարկության և հաշվարկման գործընթացը,
• ծանոթանալ ընտրությունների անցկացման պայմաններին։

Այցելուն չի կարող՝ 

• Միջամտել կամ ներգրավվել ընտրական գործընթացին,
• հարցեր տալ հանձնաժողովի անդամներին կամ ընտրողներին,
• որևէ ձևով ազդել գործընթացի վրա։

ԶԼՄ ներկայացուցիչ կարող են դառնալ պետականորեն գրանցված լրատվամիջոցների լրագրողները, օպերատորները կամ խմբագիրները, ովքեր ցանկանում են լուսաբանել ընտրությունները։

ԶԼՄ ներկայացուցիչները իրավունք ունեն՝

• Մուտք գործել ընտրատեղամասեր և ընտրական հանձնաժողովներ,
• լուսանկարել, տեսանկարել և հարցազրույց վերցնել՝ առանց խանգարելու քվեարկության ընթացքին ու գաղտնիությանը,
• հետևել քվեարկության և հաշվարկման ընթացքին,

ԶԼՄ ներկայացուցիչները իրավունք չունեն՝

• Մասնակցել ընտրական գործընթացին,
• արտահայտել որևէ քաղաքական դիրքորոշում տեղում։

Ընտրական հանձնաժողովի կազմում կարող են ընդգրկվել ՀՀ այն քաղաքացիները, որոնք՝ 

• ունեն ընտրելու իրավունք,
• ունեն բարձրագույն կրթություն,   
• չեն ծավալում քաղաքական գործունեություն։

ԸԸՀ անդամները՝

• Մասնակցում են նիստերի նախապատրաստմանը, վարմանը և քվեարկություններին։
• Կազմակերպում և վերահսկում են իրենց ենթակայության տակ գտնվող Տեղամասային ընտրական հանձնաժողովների (ՏԸՀ) աշխատանքը։։
• Ընդունում և ընթացք են տալիս քաղաքացիներից և դիտորդներից ստացված դիմումներին ու բողոքներին։
• Քվեարկության ավարտից հետո ամփոփում են իրենց տարածքի տվյալները և փոխանցում ԿԸՀ-ին։